Yon konplèks siperyorite se lè yon moun aji tankou li pi bon (pi enpotan, pi entelijan, etc) pase lòt moun pou chape anba santiman ensekirite (le’l pa kwe nan tèt li).
Se vre ke moun ki konpòte yo tankou yo pi bon pase lòt moun ka gen yon konplèks siperyorite. Sepandan, malgre yo gen tandans egzajere akonplisman yo ak kapasite yo, an reyalite yo ka fè sa pou kouvri santiman enferyorite ke yo genyen.
Li trè komen pou moun gen konplèks siperyorite. An reyalite, dapre yon etid ki fèt an 2013, pifò moun gen patipri pou tèt yo epi yo evalye tèt yo kòm siperyè pase yon moun an mwayèn.
Gen kèk moun ki gen yon konplèks siperyorite sou yon sèl domèn, tankou bote yo oswa finans yo; tandiske pou anpil lòt moun, eseye parèt pi bon pase lòt moun devni pèsonalite pi dominan ke yo genyen.
Nan atik sa a, n’ap prezante’w anpil detay sou konplèks siperyorite, tankou definisyon, karakteristik, efè, ak koz li, ak koman pou’w jere’l.
Karakteristik yon konplèks siperyorite
Sa yo se kèk nan karakteristik yon konplèks siperyorite:
- Fè deklarasyon egzajere sou reyalizasyon (konpetans, konesans, etid, …) yo oswa kapasite yo genyen
- Toujou ap konpare tèt yo ak lòt moun
- Fe yon seri de aksyon pou kouvri feblès reyèl oubyen imajinè ke yo genyen
- Minimize opinyon oswa kontribisyon lòt moun, epi bay twòp valè a opinyon pa yo.
- Yo reyaji yon fason egzajere nan sitiyasyon ki revele ensekirite (feblès) yo
- Meprize, entimide, oswa rabese lòt moun ki ka pi fò pase yo nan yon bagay
- Angaje sèlman nan sitiyasyon kote yo santi yo y’ap devan oswa y’ap ranpote pri a.
Yon moun ki gen konplèks siperyorite ka renmen jwe yon jwèt si se yo k’ap genyen, men panse ke jwèt la stipid si y’ap pèdi. “Yo ka eseye kanpe konpetisyon an, minimize ganyan yo, oswa reyaji yon fason egzajere le yo pèdi paske li touche enkyetid yo epi fè yo santi yo sòt.”
Efè yon konplèks siperyorite
Sa yo se kèk nan fason yon konplèks siperyorite ka afekte lavi yon moun:
- Li santi li pa gen vale: Anndan moun lan, li ka konsantre twòp sou defo li yo, epi li santi li gen mwens vale ke lòt moun akòz defo yo. Ouvètman, yo ka pwojte yon aparans ke yo pi bon pase lòt moun yo pou yo ka kache sans enferyorite yo.
- Difikilte nan relasyon: Li ka difisil pou moun ki gen konplèks siperyorite kenbe yon relasyon, eksepte petèt ak moun ki gen menm sans ensekirite a nan yo tou.
- Pwoblèm karyè: Moun lan ka gen pwoblèm karyè tou si li blofe oswa falsifye konpetans li pou jwenn job li pa kalifye pou yo. Pi devan, yo ka vin rekonèt ke yo pa kalifye epi santi yo trè enkyete de sa.
Kòz konplèks siperyorite
Konsèp konplèks siperyorite, ak opoze li, konplèks enferyorite, te premye dekri pa Alfred Adler, yon sikològ Ostralyen ki te fonde lekòl panse ke yo rekonèt sou non “sikoloji endividyèl”.
Yon etid 2022 ki reflete sou travay Adler, ki gen ladan’l teyori konplèks siperyorite a, eksplike ke selon Adler, levasyon timoun ak pwoblem sante mantal se koz potansyèl yon konplèks siperyorite, pou rezon ke yo eksplike anba a.
Elvasyon Timoun
Dapre Adler, timoun ki te twò dòlote ka vin two abitye a resevwa tout sa yo bezwen, epi pa janm gen chans pou aplike tèt yo epi konstwi pwop konfyans ak kapasite yo.
Yo ka santi yo merite tout sa yo vle epi panse ke mond lan la pou founi yo tout bagay, sa ki ka diminye kreyativite, inisyativ, ak kouraj yo. Sepandan, yon fwa yo mete tèt yo deyo epi kominike avèk lòt moun ki gen plis kapasite pase yo, yo ka santi yo enferyè. Olye ke yo aprann kolabore ak lòt moun epi ajiste, yo devlope yon konplèks siperyorite pou yo ka pa konfwonte reyalite a.
Kondisyon Sante Mantal
Dapre Adler, moun k’ap viv ak pwoblèm sante mantal ka devlope konplèks siperyorite tou, paske yo ka gen difikilte pou jere sante mantal yo epi vin pwofondman dekouraje. Kom rezila, sa ka lakòz yo devlope santiman enferyorite epi santi yon bezwen pou yo kouvri’l.
Men koman pou’w fè fas yon konplèks siperyorite
Si oumenm oubyen yon moun ki pwòch ou gen yon konplèks siperyorite, sa yo se kèk estrateji pou jere’l ki ka itil:
- Evite egzajere: Ou dwe onèt ak tèt ou sou kapasite’w ak reyalizasyon’w. Kominike ak lòt moun san ou pa egzajere.
- Aprann aksepte enpèfeksyon: Tout moun gen defo, e se yon bagay natirèl. Lè w enpafè, sa pa diminye valè w kòm moun. Bat pou w aksepte enpèfeksyon w yo—ak enpèfeksyon lòt moun tou.
- Pa fè konparezon: Li enpòtan pou w kapab rekonèt kapasite lòt moun epi selebre siksè yo san w pa konpare tèt ou ak yo oubyen santi’w jennen de tèt ou.
- Bat pou konstwi senpati: Sonje ke pawòl ou ak aksyon ou ka fè lòt moun mal. Konsyan epi rekonèt le ou blese lòt moun. Trete yo ak jantiyès ak senpati .
- Chèche terapi: Moun ki gen konplèks siperyorite souvan gen tandans fè eksperyans lòt kondisyon sante mantal tankou enkyetid, pèfeksyonism, oswa depresyon, ak lòt kwayans disfonksyonèl sou fason moun ki gen enpèfeksyon (nou te ka di tout lòt moun) ta dwe trete. Terapi ka ede dyagnostike ak adrese pwoblèm sa yo.
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
