Anatomi se yon branch nan syans byolojik ki konsène ak deskripsyon estrikti kò divès òganism vivan jan diseksyon revele. Diseksyon se lè yo fann kadav yon moun oubyen bèt pou etidye sa ki anndan yo
Mo anatomi a soti nan mo grèk ” anatomē ” ki vle di “koupe”. O kòmansman, moun te aprann anatomi nan koupe kadav, ki fè yo tou rele syans lan “anatomi.”
Plizyè tip anatomi
Anatomi klase an plizyè tip tankou:
Anatomi imen – Anatomi imen se etid estrikti fizik kò imen an. Li konsantre sou anpil sistèm, ki gen ladan sistèm sikilatwa, sistèm dijestif, sistèm andokrin, skelèt, sistèm lenfatik, sistèm nève, sistèm respiratwa, sistèm urine, sistèm repwodiktif ak sistèm miskilè.
Anatomi Plant – Yo rele’l tou fitotomi. Se etid estrikti entèn yon plant ki gen ladan tisi yo, sistèm rasin, tij, fèy, flè, fwi ak grenn.
Anatomi bèt – Yo rele’l tou zootomi. Li fè fas ak etid estrikti entèn yon bèt ki gen ladan selil, tisi, ògàn, zo ak lòt ògàn kò bèt la.
Depandaman de dimansyon sa y’ap etidye a, Anatomi klase an:
- Anatomi Mikwoskopik (Istoloji)
- Anatomi brit (Anatomi makroskopik).
Anatomi Mikwoskopik (Istoloji)
Imaj anndan po a travè yon mikwoskòp
Yo konnen’l tou sou non istoloji. Anatomi mikwoskopik se etid selil ak tisi jan yo wè yo atravè yon mikwoskòp. Moun ki espesyalize nan domèn sa a rele istolojis. Pwosesis istoloji a enplike nan make ak divize selil yo ak tisi yo an plizyè seksyon (moso) ke yo ka wè anba yon mikwoskòp. Echantiyon byolojik yo divize an ti tranch ki trè mens pou yo ka byen egzamine yo. Anatomi mikwoskopik itil pou egzamine ak konpare diferan kalite òganism, estrikti yo ak diferan etap nan sik selil yo.
Aplikasyon istoloji
- Souvan yo itilize imaj istoloji pou eksplike mikrostrikti selil byolojik ak tisi yo.
- Analiz echantiyon tisi yo ka revele enfòmasyon enpòtan sou nenpòt enfeksyon oswa maladi ki kache.
- Li trè itil nan otopsi (le y’ap egzamine koz lanmò yon moun) paske li ka idantifye kòz egzak lanmò a.
- Li itil nan paleontoloji, espesyalman pou idantifye fosil yo.
- Li itilize nan dyagnostik sèten selil kansè ak byopsi.
- Li itil nan lòt domèn syans vital yo.
Anatomi brit
Yo konnen’l tou kòm anatomi makroskopik. Anatomi brit defini kòm etid estrikti yon òganism ke moun ka wè san aparèy mikwoskopik. Objektif prensipal anatomi brit se twouve enfòmasyon konplè sou òganizasyon estriktirèl yon òganism.
Aplikasyon anatomi brit:
- Yo itilize anatomi brit pou etidye diferan ògàn nan kò a an detay.
- Yo Itilize’l nan andoskopi, kote yo fouye yon tib ki gen yon kamera nan pwent li nan kavite (twou) kò yon òganis.
- Yo etidye estrikti entèn ak ògàn moun ak bèt vivan pa imaj rezonans mayetik (MRI) ak radyografi.
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
