Li prèske enposib pou evite moun toksik nan lavi. Moun sa yo sanble lakòz dram tout kote yo pase, epi kreye deblozay se domèn pa yo menm. Sepandan, pifò moun pa reyalize ke moun ki gen pèsonalite negatif gen anpil bagay ki ap travèse yo anndan yo ke ou pa konnen. Moun ki blese emosyonèlman anndan yo blese lòt moun paske se doulè ke y’ap travèse a y’ap pwojte sou tout moun ki pa gen pridans.
Moun ki toksik an jeneral pa gen move entansyon; yo gendwa gen bon kè, men yo gen ka gen chòk yo te pran ki pa ko geri. Lè moun pa pran tan pou yo fè fas ak pwop demon yo, gen yon lè k’ap rive, yo pral gaye soufrans yo bay lòt moun. Yo fè sa san yo pa konnen ki jan enèji yo afekte moun ki bò kote yo.
Sa pa eskize oubyen jistifye konpòtman yo, men li eksplike poukisa moun toksik yo aji jan yo aji a. Li esansyèl pou w gen konpasyon pou tout moun epi ofri èd si w kapab. Sepandan, sa pa vle di ou oblije mache sou zepeng oswa kite moun mache sou ou tankou yon kapèt. Ou ka bay moun limit yo pandan w’ap toujou ofri lanmou ak konpasyon.
Men kèk karakteristik moun ki toksik, ak fason pou’w jere yo nan vi’w.
Men 7 karakteristik moun ki toksik genyen
1. Yo sèlman konsidere tèt yo nan relasyon.
Moun toksik sèlman panse sou ki benefis yo pral genyen nan yon relasyon san yo pa janm remèt anyen an retou. Gen moun ki rele yo “vanpi enèjetik” paske yo sanble souse tout fòs vital nan moun ki tonbe nan pèlen yo.
Moun sa yo souvan otomatikman santi yo atire pa moun ki gen kè sansib paske yo konnen moun sa yo fasil pou pyeje. Moun ki manipilatè yo pwofite sou moun ki gen bon kè e ki vrèman renmen ede lòt moun. Se poutèt sa, kenbe gad ou wo, pwoteje tèt ou avan ou konnen yon moun an pwofondè.
Etid yo montre ke relasyon pwòch ki negatif yo ka lakòz pwoblèm sante tankou maladi kè ak maladi mantal. Sonje mete tèt ou an premye, epi pa bay lòt moun enèji emosyonèl ou si yo pa ka respekte limit ou.
2. Moun toksik yo gen yon mantalite viktim (Se lòt moun ki toujou antò)
Moun negatif toujou ap blame lòt moun pou pwoblèm yo. Yo pa ka pran responsablite pou anyen paske yo manke konsyan de tèt yo, e yo manke disiplin. Nenpòt lè yon bagay pa mache nan sans yo, yo blame lòt moun pou sa menm si se nan yo pwoblèm lan ye.
Men, moun ki gen matirite t’ap antre nan yo menm pou reflechi sou fason yo ka amelyore sikonstans yo. Yo reyalize ke pran pòz viktim yo tout tan p’ap mennen yo okenn kote, paske blame lòt moun retire nesesite pou pran responsablite pou aksyon’w yo.
Kidonk, si ou remake yon moun bò kote’w toujou ap blame lòt moun, li ka gen yon mantalite toksik. Si w’ap pale avek yo epi ou wè y’ap plede blame lot moun, chanje sije konvesasyon an. Yo ka bezwen yon moun pou koute epi bay yon nouvo pèspektiv.
3. Yo fe jalouzi kont lòt moun ke yo wè ki parèt siperyè pase yo.
Moun ki toksik anvye lòt moun pou stati yo, karyè yo, akonplisman yo ak byen yo. Yo toujou ap konpare tèt yo ak lòt moun pou yo ka wè kiyès li siperye. Pèsonalite negatif souvan soufri ak yon konplèks enferyorite, kidonk yo konsidere tout lòt moun kòm yon menas.
Si w remake konpòtman sa a nan yon moun ki nan antouraj ou, eseye pa kite sa nwi’w pèsonèlman. Nenpòt moun ki rabase’w pou akonplisman’w oubyen mòd de vi’w swete se yo ki te nan plas ou an kachèt, majorite dè ka.
4. Yo menase moun ak entimidasyon oubyen lòt fòm mechanste.
Moun toksik souvan montre taktik anmaskay pou enève moun. Yo itilize metòd tankou bay lòt moun vye non oubyen fè blag ki derespektan sou moun, apre pou y’ap di “Ah, se jwe m’ap jwe”. Moun toksik pwofite nenpòt opòtinite pou minimize lòt moun pou yo ka pase pou pi wo. Tanpri pa kite bagay negatif moun ap di sou ou chanje fason ou wè tèt ou.
5. Moun ki toksik, mantè pase yo pa genyen.
Bonjou moun sa yo pa laverite! Kòm yon lòt fòm manipilasyon sikolojik, pèsonalite toksik yo souvan santi yo gen yon pouse enkontwolab pou yo bay manti. Pou prezève ego yo, yo toujou kenbe yon imaj patikilye nan mitan lòt moun paske yo vle lòt moun wè yo kòm moun ki gen otorite. Moun toksik gendwa bay yon manti la a, apre sa yo chanje konvèsasyon an pou moun ka pa wè pati ki lèd nan pèsonalite yo.
6. Yo toujou ap plenyen.
Moun negatif sanble pa janm remake anyen ki bon k’ap pase nan lavi yo. Yo toujou ap lonje dwèt sou pwoblèm ki nan lavi yo san yo pa apresye pati pozitif yo. Sa lakòz yo gen amètim ak jalouzi kont moun ki bò kote yo. Pa gen moun ki renmen pase ak moun k’ap plenyen, kidonk kenbe distans ou ak moun ki toksik.
7. Relasyon yo tèt anba
Moun ki toksik sanble pa janm ka kenbe relasyon ki stab paske deblozay swiv yo tankou yon epidemi. Moun ki pwòch avèk yo dekri yo kòm moun ki pa stab nan reyaksyon yo oubyen enprevizib akòz atitid yo ka chanje nan yon bat je.
Si ou gen pou kominike avèk pèsonalite sa yo souvan, etabli yon bon limit. Pa egzanp, pale avèk yo sèlman de sijè ki pa sansib, ki pap mennen nan okenn konfwontasyon.
Panse final sou karakteristik moun ki toksik yo
Malerezman, ou pa ka evite moun ki renmen koze dega nan monn jodi a. Gen moun ki ka kontwole prejije natirèl yo gen anndan yo, men gen lòt moun ki pa ka kontwole yo e santi fòk yo pase kolè yo sou lòt moun.
Sonje mete tèt ou an premye lè w ap fè fas ak pèsonalite ostil epi evite plonje nan lapenn yo. Ou ka toujou gen senpati pou lòt moun san ou pa oblije absòbe tout enèji negatif ke y’ap pwojte.
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
