Pa gen pi bon feeling pase lè ou jwenn pouvwa pou fè rèv ou tounen reyalite. Lè’w gen yon kwayans ki byen anrasine nan tèt ou ak kouraj pou w sezi opòtinite lè yo parèt, sa prèske ba’w garanti ke w’ap atenn objektif ou kanmenm.
Erezman, gen estrateji ki ka ede ou devlope kalite sa yo si ou pat ko genyen yo. Men 6 fason kle pou’w bay tèt ou otorite pou ou konkeri rèv ou:
1. Kwè nan tèt ou
Lè ou kwè nan tèt ou avèk fèmte, se premye etap pou’w reyalize rèv ou avèk siksè. Sa vle di ou gen konfyans nan pwòp kapasite ak abilite’w pou ou fòme destine ou.
Si ou twouve li difisil pou ou kwè nan tèt ou, gen anpil aktivite ke ou ka fè pou konstwi estim ou. Men kèk bon pratik:
- Antoure tèt ou ak moun ki renmen bay sipò epi ki pozitif
- Chèche yon konseye oswa yon antrenè ki pou gide w
- Soti nan zòn konfò ou epi aksepte nouvo defi
- Evite pale mal de pwòp tèt ou (pa di ou pa entèlijan ase, ou pa sòti nan gwo fanmi, etc.)
- Raple tèt ou de konpetans ou , fòs ou, ak akonplisman ou yo
Abitid sa yo ka ede w santi w gen plis pouvwa epi ba w ankourajman ki nesesè pou pouswiv rèv ou. Avèk konfyans nan tèt ou kounye a, ou ka kòmanse pran etap ki nesesè yo pou’w fè aksyon epi travay nan direksyon objektif ou yo.
2. Bati yon kominote ki vle pouse ou an avan
Kèlkeswa jan ou travay di oubyen jan ou konsantre, li prèske enposib pou’w reyalize rèv ou pou kont ou. Se poutèt sa li enpòtan anpil pou’w gen yon sistèm sipò.
Sa vle di antoure tèt ou ak moun ki non sèlman konprann epi kwè nan vizyon’w lan, men tou ki vle ede w sou wout la. Chèche konseye ak modèl k’ap la pou ou nan moman difisil epi ba’w fidbak ki onèt sou pwogrè ou. Epi chèche zanmi oswa kòlèg ki gen vizyon ki sanble ak pa’w la, ki gen rapò ak anbisyon ou, epi ki ka ba’w bon konsèy pandan tout pakou’w.
3. Devlope yon plan aksyon
Pou fè rèv ou tounen yon reyalite, ou dwe tou dabo tradwi yo an objektif ki aksyonab (lè ou defini egzakteman ki aksyon pou’w pran). Si ou vle lanse yon biznis, kreye yon ajanda ki gen tout etap ou bezwen pran yo ak dat ke yo dwe reyalize. Si ou gen yon objektif pou ekonomize plis lajan, trase yon bidjè ki esplike revni ou ak depans ou.
Yon fwa ou defini vizyon inisyal la klèman, divize chak etap an plizyè moso ke ou ka jere epi bay yo dat limit. Sa ap ede ou priyorize efò ou yo epi rete konsantre sou travay la. Epi plis w’ap akonpli chak etap sa yo epi ou pase trè sou yo, se plis w’ap santi gwo objektif ou a vin pi posib e fasil pou reyalize. Pa bliye, konkeri rèv pa fasil – espesyalman san yon plan aksyon byen klè.
4. Pran risk
Risk se yon pati esansyèl nan reyalize siksè. Pran risk vle di chèche nouvo opòtinite epi pouse tèt ou pou elaji zòn konfò ou.
Si w santi w entimide oswa menm paralize pa risk epi ou pè echèk, rekonèt ke gen sèlman 2 bagay ki ka rive: Se swa ou fè siksè oubyen ou aprann. Epi eksperyans ke ou jwenn nan nenpòt ladan yo gan anpil valè.
Kidonk, fè yon ak de fwa (acte de foi) epi komanse vwayaj objektif ou. W’ap benefisye yon bagay kanmenm kelkeswa rezilta a.
5. Byen pran swen tèt ou
Youn nan pi gwo baryè pou reyalize rèv ou se lè’w santi tèt ou chaje paske bagay yo twòp. Donk, pou’w rete motive e pwodiktif, fòk ou byen pran swen tèt ou. Chèche fason pou’w nouri tèt ou fizikman e mantalman, pandan tout pakou a. Pran poz lè sa nesesè, dòmi ase, epi fè egzèsis regilyèman.
Lè ou priyorize swen tèt ou, enèji ak antouzyasm ou ap ogmante, ki ap pèmèt ou atake pi gwo pwojè ak fasilite. Epitou, bay tèt ou tan ak espas pou panse ak reflechi. Sa ap ede ou rete konsantre kèlkeswa obstak ki vin sou wout ou.
6. Selebre ti akonplisman yo
Li fasil pou ou fokis sèlman sou rezilta final rèv ou epi bliye jwi chak etap enpòtan ou reyalize sou wout la. Selebre ti siksè yo sou wout la ap kenbe nivo motivasyon ou wo epi ba ou yon sans de akonplisman (w’ap santi ou se yon chanpyon).
Pou chak tach ke ou akonpli nan lis ou a, fè tèt ou plezi – kit se bwè yon byè, gade yon fim ke ou renmen anpil, oubyen jis fè yon ti soti al nan yon aktivite lwazi. Lè‘w pran tan pou apresye ti viktwa yo, l’ap fè vwayaj la pi agreyab epi ankouraje w kontinye pouse pi devan.
Lè’w suiv estrateji sa yo epi rete devwe nan objektif ou yo, ou ka bay tèt ou pouvwa pou rive devni sa ou pat janm espere! Al komanse travay pou’w fè rèv ou tounen reyalite depi jodi a. Ou se sèl moun ki ka chanje avni ou.
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
