Li pa rekòmande pou kominike tout ti detay nan lavi ou a tout moun; pafwa yon zòrèy k’ap koute ka vin tounen yon djòl alèlè. Kenbe sekrè ou pou tèt ou.
Sa pa vle di w’ap bay manti. Gen bagay ki sipoze rete prive, ou pa dakò? Diskite sou enfòmasyon pèsonèl ou ak tout moun, sitou pwoblèm sansib, jeneralman mennen nan desepsyon.
Men senk bagay enpòtan ke ou bezwen kenbe sekrè:
1. Panse Entim ou yo
Sa ou panse sou sèten sijè ta dwe rete kòm sistèm kwayans ou, men se pa bagay ou ta dwe ap fose sou lòt moun.
Pa egzanp, kwayans ou sou lavi oswa lanmò ka lakoz divès reyaksyon lè’w chwazi yo kòm yon sijè diskisyon. Aprann konprann ke panse ou se entèpretasyon ou epi ou pa dwe pouse yo sou moun kòm verite absoli. Pozisyon sa a ka evite’w de anpil gwo diskisyon.
2. Lè ou fè yon zak de charite (fe bon zèv a yon moun)
Ede yon moun oswa fè yon travay charitab amelyore devlopman nan moun ak sosyete a, men li gen plis valè lè ou pa chèche rekonesans pou byenveyans sa yo. Ou pa oblije al poste’l sou Facebook oubyen Tiktok pou “likes”.
Lè w eseye fè piblisite sou bon zèv ou te fè, li jeneralman parèt tankou w’ap vante tèt ou. Moun ka panse ke entansyon’w pou sipò ou te bay la se pou’w chèche popilarite. Genyen valè moral nan bay èd ki rete anonim.
3. Objektif ou yo
Ou ta dwe kenbe plan ou yo ak tout dilijans jiskaske ou kapab reyalize yo. Vokalize plan ou yo ka lakòz lòt moun vòlè lide ou epi travay sou yo.
Yon eksperyans demoralizan konsa ka fè ou regrèt ou te esplike plan ou yo bay nenpòt moun, kidonk kenbe yo sekrè. Kenbe yo an sekirite.
4. Mòd de vi ou
Sèten detay sou pèsonalite ou, tankou lavi sèksyel ou, lavi relijye’w, move abitid ou yo, elatriye pi bon si ou gade yo sekrè sof si ou fè moun ou ap pale konfyans.
Li pa vo la pèn pou’w devwale kondisyon emosyonèl ou bay nenpòt moun. Li ka menm mennen nan diskisyon si lòt moun lan pa dakò ak chwa stil de vi ou.
5. Dram ki nan fanmi’w
Se yon mank de respè ak enpridans lè ou rakonte istwa konfli nan fanmi’w bay lòt moun. Li devalorize ou kòm yon moun epi li ka fè moun ridikilize fanmi ou.
Souvan, istwa sa yo pase de bouch an bouch jiskaske istwa sa’k te pase a chanje nèt. Pwoblèm nan kay la pi byen rezoud nan kay la. Menm jan pwovèb la di, rad sal dwe lave an fanmi. Kenbe pwoblèm fanmi ou nan limit kay ou ak moun ou renmen yo.
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
