Kòm ou ka remake sa deja, lavi a se yon vwayaj sa a pa fasil. Kidonk, se t’ap youn nan po gwo erè pou’w ta kite tèt ou tonbe nan yon seri de pyèj ki nan lavi. Fason ou viv lavi’w depann totalman de oumenm e de chwa ke ou fè.
Si’w te chwazi pase tout tan’w sou Facebook ak Instagram le vwazen’w t’ap plante, w’ap oblije reziye’w ret nan figi fennen ak grangou klowoks le l’ap rekolte.
Ann pale de 15 pyèj pou evite nan lavi pou nou ka fè yon ekperyans ki pi bon e pi pozitif.
1- Prokrastine
Eske sa pa konn rive ou gen yon pwojè enpotan pou’w travay sou li, men ou di “kite’m relaks mwen pou kounye a, ma gentan fe’l demen si Dye vle”? Sa rive majorite nan nou. Anpil fwa sa rive paske nou pè echek.
Prokrastinasyon kapab kreye strès. Lè’w konnen ou gen yon dosye enpotan pou’w regle men ou kontinye evite’l, sa kapab kreye yon sous enkyetid, e sa ka afekte sante fizik ak mantal ou.
Kounye a ou konnen ki pwoblèm sa ka bay, lè’w gen yon bagay pou’w regle, fè tout sa’w kapab pou’w komanse travay sou li imedyatman.
2- Awogans
Lè ou fyè de reyalizasyon w ak kapasite w se yon bagay ki natirèl e ki nomal nan lavi w. Li ka ba ou konfyans nan tèt ou pou simonte defi yo e travay di pou’w fè siksè. Sepandan, twòp awogans kapab vin yon baryè pou amelyore pwòp tèt ou. Lè ou twò awogan, ou ka pa admèt defo’w yo, ki ka anpeche ou aprann ak pwogrese.
Imilite vle di ou rekonèt ke ou pa konn tout bagay e ke ou ka toujou aprann de lot moun. Ou dwe aksepte resevwa kritik konstriktif e pran dispozisyon pou’w aprann de erè ou yo. Kidonk, ou ka selebre reyalizasyon ou yo, men pa monte tet ou pi wo ke lot yo.
3- Pa balanse tout opsyon yo avan’w pran yon gwo desizyon
Ou ta dwe envesti yon gran kantite efò le w’ap pran yn desizyon nan lavi. Ou pa dwe jis chwazi premye bagay ou wè a; ou ta dwe pran yon ti tan pou’w analize lot opsyon ki disponib.
Poukisa sa enpòtan?
Konbyen moun ou konnen k’ap pase mizè kounye a ak yon mari oubyen yon madanm, akoz yo deside antre nan maryaj ak moun sa a pa emosyon, san yo pa vreman konnen pèsonalite moun lan an pwofonde? Konbyen moun ki te al aprann yon pwofesyon, epi se lè yo preske tèmine etid la yo reyalize gen yon lot domen yo prefere, e sa yo aprann lan p’ap tèlman ede yo pase sa?
Gen desizyon ou pran san reflechi ki ka afekte’w pou tout res vi ou, e ou pa ka tounen nan pase’w pou ranje sa. Lè w fè fas ak yon desizyon, pran yon ti moman, reflechi sou opsyon ou yo, epi fè chwa ki mennen w nan yon lavi ki pi satisfezan e ki gen sans.
4- Viv yon vi gran panpan ki pa nan nivo’w
Wi, nou ap viv nan yon monn materyèl, e sa ka rive ou se yon moun ki trè materyèl. Men, lè ou fokis sou posede anpil bagay ki konn pa esansyèl, sa rele materyalism, e sa ka fè’w mennen yon vi enkyetid nan domen finansyè.
Sa konn rive depi yon kob tonbe nan men’w, ou gentan wè mil fason pou’w ta depanse’l. Ou anvi al fè shopping, ou anvi chanje mak telefon, etc. Pa gen anyen ki mal nan sa, men fok ou proyorize bezwen primè yo avan.
Si w chwazi viv yon fason ki koresponn ak revni w epi ou evite fe depans ki pa nan nivo’w, ou ka gen plis kè poze.
5- Tonbe nan dèt ki depase’w
Tout moun ki fè eksperyans ak dèt ke yo te mal pou peye konn sa a byen. Depi moun ou dwe a antre yon kote epi ou te la, ou tonbe nan mawon, manti sou manti, amitye kraze, elatriye.
Kredi se yon zam pwisan lè w konn koman pou’w itilize’l pou’w fè kob la fè pitit. Malerezman, majorite moun pa gen strateji oubyen volonte pou sa.
Lè ou entelijan ak kredi’w, li ka vin yon zouti itil olye ke l yon gwo fado.
6- Panse ke moun ap toujou la pou ede w
Konfye’w mwens nan etranje e plis nan tèt ou. Epi mete nan tèt ou ke se oumenm ki responsab pwogre pèsonèl ou, pa yon lot moun.
Ou ka e ta dwe bati yon sistèm moun ki pou sipote’w, men se tout sa ke yo ofri: sipò. Yo pral ede w kenbe branch ou wo, men ou p’ap ka grandi si ou pa gen yon rasin ki fèm.
Vrè ekilib la se lè w endepandan epi w gen yon sistèm sipò solid.Lè w endepandan sa vle di ou chache gen kapasite ak konfyans nan tèt ou pou okipe travay ak defi’w yo poukont ou. An menm tan, l’èw gen yon sistèm sipò solid, sa vle di ou gen moun ou ka rele pou baw èd ak konsèy lè’w bezwen yo.
Jwenn bon balans lan se sèl fason ou evite pyèj yon lavi ki enèvan.
7- Bay manti
Di yon sèl manti kapab vin bay nesans ak yon latriye lot manti. Chak manti ou bay, ou oblije bay yon lot pou’w kouvri premye a. konfyans se tankou yon bèl po atizana byen dekore ak bel dizay, men tou ki trè frajil. Yon fwa kraze, li prèske enposib pou ou rekonstwi’l.
Lè w di laverite, ou okipe po sa a ak anpil atansyon epi asire w li rete an antye. Onètete se pwoteksyon konfyans ak entegrite nan relasyon’w. Li vle di ou fyab, e moun ka kwè nan sa ou di. Se baz ki ka sipòte koneksyon solid ak dirab.
8- Lè w adikte nan medya sosyal ak lòt ti kantite dopamin
Le w’ap glise dwèt ou nan pos Facebook, Instagram, Tiktok, elatriye, epi konpare lavi ou ak rekò ak bobin lòt moun, sa ka kreye yon sans de insifizans epi retire lajwa ou.Nan epòk dijital sa a, li fasil pou Entènèt le fè’w bliye richès ki nan lavi w chak jou, pandan ke anpil sa w’ap gale sou medya sosyal yo pa laverite.
Kenbe yon bon balans ant medya sosyal ak eksperyans nan lavi reyèl pèmèt ou apresye bote nan toulède. Kidonk, pandan ke medya sosyal yo kapab yon bon fason pou konekte ak lòt moun epi pataje lide nou, li enpòtan pou nou pa kite li bloke enpotans esperyans lavi reyèl ou yo.
9- Panse se ou ki viktim nan tout sitiyasyon
Nan preske tout konfli, chak moun vle sèmante yo gen rezon, epi lot la menm anto. Poutan, se pa sa vre.
Lè’w gen responsablite, li amelyore kapasite’w pou rezoud pwoblèm.Lè w rann tèt ou responsab, ou gen plis chans pou w chèche yon solisyon olye w fokis sou pwoblèm nan.
Li fasil pou’w tonbe nan mantalite viktim lan, men ou entèlijan ase pou’w evite tèt tonbe nan pyèj sa a.
10- Baze konesans ou ak siksè’w sou yon diplòm
Sa a se gwo manman koze. Edikasyon tradyonèl se tankou premye etap nan yon long vwayaj, men li enpòtan pou w sonje ke aprann ak grandi nan kapasite’w pa ta dwe sispann apre w fin konplete edikasyon fòmèl ou. Vwayaj konesans lan dwe kontinye pandan tout lavi ou, epi l’èw konte sèlman sou diplom ke ou te pran nan lontan sa ak etid ou te acheve, sa ka anpeche’w pwogrese.
An reyalite, aprantisaj yo ta dwe kontinyèl.Mond lan toujou ap chanje, e gen bokou plis konesans pou eksplore ak konprann. Etid ou te fè lontan yo, gen yon paket bagay ki chanke ak ajoute ladan yo kounye a.
Lè’w toujou ap chache konnen epi ou eksplore nouvo konesans, w’ap amelyore konpetans ou epi ou rete enpòtan nan domèn ou. Kontinye aprann ak grandi pou asire yon lavi ranpli ak siksè ki reflete tout potansyèl ou.
11- Chache twop atansyon nan men lòt moun
Lè w’ap bat pou’w jwenn atansyon lot moun pou move rezon, sa ka anpeche’w atenn objektif ou. Lè ou natif natal e ou otantik ak tèt ou, sa enpresyone moun plis ke le w’ap aji yon fason ki fek sèlman pou jwenn atansyon.
Otantisite atire moun paske anpil lot moun konn ap eseye pase pou sa yo pa ye. Poutan, lè ou aji entansyonelman yon fason pou’w jwenn atansyon, moun ka empresyone vre pou yon ti bout tan, men y’ap abandone’w lè yo reyalize ki jan de moun ou ye tout bon.
12- Konpare tèt ou ak lòt moun
Lè’w ou toujou ap konpare tèt ou ak lòt moun, sa ka mennen yon santiman ensekirite ak mekontantman.
Pou kenbe yon pi bon atitid, li esansyèl pou konsantre sou pwòp vwayaj ou ak kwasans pèsonèl ou. Se tankou ou tèlman okipe nan gade jaden yon lòt moun, ou neglije pwòp jaden pa’w e ou bliye awoze’l jiskaske li pedi bote’l.
Lè w konsantre sou vwayaj ou ak kwasans pèsonèl ou, ou rete fidèl ak tèt ou, ou devlope potansyèl ou, e ou pa kite sa lot moun ap regle distrè’w. Konparezon ak lot moun ka vòlè lajwa ou, men nouri kwasans ou pèmèt ou selebre reyalizasyon ou yo.
13- Panse ke a lavni, Gen yon mirak ki pral fèt, epi afè’w pral pi bon
Pyèj sa a se lè yon moun kwè ke vrè vi’l pral komanse a lavni, epi lè sa a yon pot ap louvri pou rezoud pwoblèm li yo. Moun ki tonbe nan pyèj sa a pa enterese nan pouswiv objektif yo. Y’ap tann yon moman majik kote tout pwoblèm yo pral rezoud pafètman.
Pou’w evite pyèj sa a, fok ou konnen ke se kounye a menm ke ou dwe komanse. Chak moman, chank eksperyans, chak desizyon kontribye nan istwa lavi ou. Anbrase moman prezan an, defini kek objektif ki klè, epi komanse travay sou yo.
14- Enflasyon stil de vi
Pyèj sa a se lè yon moun komanse fè yon ti siksè finansyè nan vi’l, epi san zatann, li komanse ap fè gaspiyaj lajan, achte rad ak bijou ki chè. Pafwa tou, moun lan konn twouve ke ansyen zanmi’l yo pa bon pou li anko, li bezwen fwote ak moun a kob. Ou ka enjoy ti moman endiljans sa a, men sa ka mennen’w rapidman nan yon vi enstabilite finansyè.
Pou’w evite tonbe nan pyèj sa a, proyorize responsabilite finansyè, fè ekonomi e fè kob ou sanble yo fè pitit. Panse a long tèm, e planifye pou sekirite finansyè.
15- Bat pou’w fe tout moun plezi
Plis ou komanse gen matirite, se plis ou reyalize ke kèlkeswa sa’w fè, gen moun k’ap toujou chache yon rezon pou yo kritike’w. Menm Jezi ki te mennen yon vi pafè sou tè a, gade ki kantite moun ki te leve kont li jiskaske yo krisifye’w.
Zanmi’m, w’ap jwenn moun ki rayi’w pou konesans ou genyen, pou sa ou posede, pou aparans ou, elatriye. Pi mal toujou, gen moun k’ap rayi’w pa jalouzi, jis paske ou se yon bon moun, e lot moun apresye’w.
Si w rive evite pyèj sa yo ke nou te montre w la jodi a, vwayaj ou a ap vin pi dous pase sa ki te vini anvan w yo. Bon chans, epi na wè yon pwochen fwa!
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
