Tout moun konn gen tèt fè mal yon lè konsa. Maltèt entèwonp kapasite w pou fonksyone nòmalman nan aktivite’w. Gen tèt fèmal ki konn pi mal pase yon lòt. Kèlkeswa nivo tet fèmal la, men 13 fason natirèl ou ka eseye pou jwenn soulajman rapid.
Men 13 fason natirèl pou’w jwenn soulajman ak tèt fè mal vit.
1 – Bwè anpil dlo
Bwè yon gwo vè dlo. Apre sa, bwè yon lòt. Dezidratasyon konn koz tèt fè mal, sitou nan peyi ki fè cho anpil. Ou ka pa janm reyalize si’w dezidrate jiskaske tèt fè mal parèt.
Rechèch montre ke an jeneral, kò a bezwen ant demi galon jiska yon galon dlo chak jou. Gen moun ki bezwen plis dlo ke lòt yo, tankou fanm ansent oubyen kap alete timoun, moun ki travay nan solèy, moun ki dyabetik, elatriye.
2 – Konsome yon ti kafeyin
Yon lòt remèd rapid pou soulaje tèt fè mal se manje oswa bwè yon bagay ki gen kafeyin. Pou konsome kafeyin, bwe yon tas kafe, manje yon ba chokola, oubyen bwè yon bwason gaze oubyen te ki gen kafeyin. Anpil medikaman yo fè pou tèt fè mal gen gwo dòz kafeyin, kidonk w’ap repwodui sa yo fè lè w konsome yon gwo kantite kafeyin pou soulajman tèt fè mal. Men yon lis manje pou w pran lè yon maltèt tansyon fè w desann
3 – Eseye konsome jenjanm
Jenjanm diminye doulè tèt fè mal ak kè plen ke sa ka koze. Rechèch montre ke non sèlman jenjanm ka soulaje doulè a, soulajman moun ki pran jenjanm yo dire 2 zè de tan pi lontan ke moun ki te pran konprime maltèt. Jenjanm tou ka ede moun ki gen kè plen ak vomisman ki pafwa konn akonpaye ak yon maltèt. Ou ka fè te ak jenjanm lan, men sanble jenjanm kri bay bi bon rezilta.
4 – Masaj kek pwen prensipal nan vizaj ou ak tet ou
Men kèk pwen masaj ki sanble bay soulajman a maltèt pou anpil moun
- Pwen sou chak bò twou nen ou, ki aliyen vetikalman ak je’w. Masaje pwen presyon sa yo ka ka ede’w soulaje tansyon nan tèt ou.
- Nan mitan sousi ou. Masaj pwen sa a ka ede diminye fatig nan je ak tèt fè mal.
- Pwen nan mitan dèyè tèt ou. Masaj pwen sa yo pou soulaje doulè sinis ak gwo maltèt.
- Kwen sousi ou: Masaj kwen sousi ou jiskaske ou santi doulè a komanse soulaje.
- Nan letanp ou yo. Aplike presyon sou zòn sa a pou soulaje tèt fè mal oswa doulè nan je.
- Pwen dèyè kou’w. Aplike presyon ak yon mouvman sikilè pou 1 minit. Ou ta dwe santi doulè tèt fè mal la soulaje.
5 – Yon pake glas
Yon pake glas sou fwon ou se yon remèd rapid pou tèt fè mal. Ou ka mare kèk moso glas nan yon ti sèvyèt. Kouche ak li sou tèt ou pou 15 minit. Si ou pa gen yon pake glas sou men, ou ka itilize yon sachè legim oubyen fwi nan frizè’w (si’w genyen). Tanperati fret la ap soulaje doulè a epi redwi tansyon an nan tèt ou.
6– Ale nan yon chanm ki fè nwa
Si sa posib, ale nan chanm ki pi fe nwa lakay ou pou w jwenn soulajman. Evite ekran televizyon, òdinatè, ak telefon. Si ou pa gen yon chanm nwa lakay ou, rale rido yo epi fèmen tout limyè yo.
7 – Evite moulen manje ki di
Twop mouvman nan machwè’w ka fè ou santi tet fè mal la plis. Eseye detann figi’w otan ke ou kapab. Si ou se yon moun ki graje dan’w anpil lannwit lè w’ap domi, ou ka leve nan maten ak yon tèt fè mal. Si ou gen yon dantis, pale avek li sou sa. Yo ka sijere ou jwenn yon gad bouch pou anpeche dan’w graje lè w’ap domi. Sa ap sove dan ak jansiv ou epi anpeche tèt fè mal sa a chak maten.
8 – Dlo cho sou pye ou
Dlo cho sou pye ka soulaje tet fè mal pou kèk moun. Kite dlo cho a an kontak avèk pye’w pandan plizyè minit. Sa ap ogmante sikilasyon san nan pye ou ak nan tout kò ou, ki gen ladann tèt ou. Sa ka soulaje maltèt la.
9 – Egzèsis respirasyon pou soulajman tèt fè mal
Chèche yon pozisyon konfòtab, tankou kouche sou kabann ou oubyen chita sou yon chèz konfòtab. Pran souf regilyèman, konsantre sou lè w’ap rale souf ou antre ak lè wap pouse’l soti. Rale souf ou pou sis segonn, apresa pouse’l soti pou sis segonn. Pandan w ap fè sa, detann misk (vyann kò’w) ou yo. Teknik sa yo ka ede soulaje tansyon an nan tèt ou ak diminye doulè tèt fè mal.
10 – Manje manje ki pike
Eseye manje nouriti ki gen piman pike, oubyen simen piman an poud sou manje ou. Manje sa yo gen kapsaysin, yon remèd natirèl ki ede kontwole doulè.
Se 10 strateji sa yo nou te pote pou ou sou koman pou ou koresponn ak maltèt. Nou espere ke ou te aprann yon bagay de nouvo. Swiv nou sou medya sosyal yo (Facebook, Instagram,…) pou’w ka jwenn anpil lòt fomasyon ak konansans k’ap ede’w. Pataje yo ak yon zanmi si’w panse sa ap nan avantaj li.
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
