Lè ou konsidere bonè ou, ou ka kwè ke li lye ak richès ou, bote, ak pozisyon ou nan lavi. Men kontrèman, li plis lye ak kalite relasyon ki bò kote w. Moun se kreyati sosyal, e lè’w gen bon zanmi ki antoure’w, sa ba’w anpil kontantman nan lavi. Moun negatif yo ka difisil pou’w jere, e jan moun sa yo pesismis se yon veritab tèt chaje.
Moun ki negatif ka afekte atitid ou, ba ou enkyetid, ak lakòz ou vin pa kwè nan moun ki bò kote’w. Li difisil tou pou reyalize rèv ak konkeri objektif ou lè moun ki negatif kraze tout plan nan lavi ou. Se s’ak fè moun sa yo merite pou’w inyore yo. Nou pote pou ou 10 rezon ki fè ou dwe inyore moun ki negatif.
1. Moun ki negatif detwi enèji w
Moun negatif yo ka chanje fason ou panse ak fason ou santi’w lè’w rankontre ak pwoblèm, sitou si w pase anpil tan avèk yo. Yo ka chanje fason ou konprann mond nan si w koute yo. Pafwa ou ka santi ou chaje ak enèji ak motivasyon pou’w reyalize yon bagay ki t’ap ede’w reyalize rèv ou, epi pesimis yo ka parèt ak tout negativite yo e fèw pèdi motivayon nan yon bat je.
2. Le’w lye ak moun ki negatif, y’ap jije’w menm jan avèk yo.
Konbyen fwa ou konn tande yo di yo rekonèt ou pa moun ke ou asosye’w avèk yo? Se vre, menm nan lanati, zwazo ki gen menm plim vwayaje ansanm. Lè ou antoure tèt ou ak moun ki negatif, sa andomaje kredibilite’w, e sa pap pran anpil tan pou’w komanse tounen yon moun ki negatif tou.
3. Li difisil pou’w debarase’w de moun ki negatif.
Eske ou pa janm fe eksperyans ak yon matla ki enfeste ak pinèz? Kèlkeswa sa ou fe pou’w elimine yo, de jou an jou yo vin pi plis, jiskaske ou oblije jete matla a. L’ew antoure’w ak yon bann moun ki negatif, debarase’w de yo se tankou yon kaskèt chinwa. Menm jan yon ak yon pakèt pès, yo gen tandans kole sou ou e kontamine tout bagay w’ap antreprann.
4. Moun negatif yo ka afekte sante w
Gen yon etid yo fè nan inivesite John Hopkins ki montre ke negativite kwonik gen yon enfliyans dramatik sou risk pou moun fè maladi kè. Rechèch la dekouvri ke moun negatif yo gen 13 pousan plis chans pou yo devlope maladi kadyak pase moun ki optimist.
5. Moun negatif renmen kreye Dram
Moun ki negatif renmen egzajere tout ti bagay pou kreye dram. Yon senp bagay gendwa rive yo sanzatann, epi li chanje atitid yo pou nenpòt yon semèn. Moun negatif gen anpil difikilte pou yo kite yon move sikonstans dan le pase, epi yo kite sikonstans lan fè yo vin pi negatif toujou. Lè moun sa yo ki pwoch ou toujou ap plede plenyen, sa ka afekte santiman’w e fè w pa apresye lavi.
6. Negativite ap fè w sonje ke lavi twò kout pou’w viv yon vi mizerab
Zanmi’m, si w ap viv sou tè sa a pou 70 ane, w ap gen 25,550 jou pou fè la diferans. Pandan ke li parèt anpil jou, jou yo vole rapid. Èske li pa ta’p pi bon pou w ranpli jou’w ak souri ak kontantman olye w kite negativite fè lavi’w mizerab?
7. Moun Negatif Refoule Progrè’w
Paran yo gen yon travay enpòtan pou elve pitit yo pou yo vin granmoun ki konplè e byen fome. Yo dwe ba yo pozitivite ak ankourajman pou yo ka grandi ak fleri. Dapre yon etid nan yon inivesite (Walden University), pawòl ki sot nan bouch moun gen pouvwa pou konstwi oubyen detwi. Nenpòt sa ou di yon timoun ki denigre epi ki deranje estim yo konsidere kòm abi vèbal.
Yon timoun ke tout tan paran’l ap di’l li pap janm anyen ap vin kwè nan sa paran di a, e sa ka anpeche yo fe siksè nan lavi. Menm jan an tou, yon timoun ki resevwa anpil konpliman nan men paran’l e ki kwè yo ka devni nenpòt sa yo vle gen plis chanse pou reyisi nan lavi. Kidonk, si ou vle grandi epi atenn objektif ou, ou dwe chase moun ki negatif nan lavi ou.
8. Ou manke sipò
Pandan w’ap travèse lavi sa a, ou bezwen yon sistèm sipò solid . Moun ki pozitif ap soutni’w nan tout sikonstans, ni lè w’ap soufri ak lè wap rejwi. Moun ki negatif pa nan bagay konsa, ankouraje moun se pa domèn yo.
9. Moun negatif fè ou fè bak
Moun ki negatif souvan pa gen okenn rèv ke y’ap pouswiv. Yo jis reziye yo pou yo pase rès vi yo ap plenyen epi blame lòt moun (gouvenman, boujwazi, etc..) pou echèk yo. Sa konn fè yo finalman antre nan asosyasyon malfektè ak bandi. Anpil jèn te gen gwo vizyon ak abjektif yo te komanse travay sou yo, men akoz yo vin asosye ak moun negatif, tout vizyon sa yo tonbe nan dlo, e yo vin antre nan komèt zak moun pat janm espere de yo.
10. Negativite chanje fason ou panse
Si ou pase tout tan’w ak moun ki negatif, ou pa ka espere yon vi ki plen pozitivite. Moun ki pesimis met aksan sou pawol negatif ke ou di, e y’ap ba ou 1000 rezon pou’w jistifye tout panse ou genyen ki toksik. Men, yon moun ki pozitif ap ranfose lavi’w ak optimizm. Menm lè tout mond lan ta leve kont ou, yon moun ki pozitif ap rete kom yon soutyen pou ou.
Panse final sou moun negatif
Chak jou ou gen anpil chwa ou fè pou lavi ou. Ou chwazi sa pou manje, kisa ou vle devni, ak ak ki moun ou vle pou asosye avè yo. Si ou asosye’w ak moun ki negatif, avan lontan, w’ap devni yon zanmi tout moun vle evite. Li ka pi fasil pou’w mete yon fen nan amitye oumenm ak kòlèg travay ou ke yon manb nan fanmi’w. Men, malgre sa, ou ka toujou trase yon limit pou moun ou pa ka evite pa depase. Plis ou pase mwens tan ak moun ki pesimis, se plis lavi’w ap amelyore.
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
