Pou nou atenn objektif nou, nou bezwen chanje fason nou panse ak aji, sa ki pèmèt nou vin pi bon vèsyon de tèt nou. Petèt, nou pa ko prè pou chanjman paske nou pa ko devlope abitid siksè ki nesesè yo, epi nou tèlman gen anpil distraksyon ke nou pa menm konnen kisa ki vrèman enpòtan pou siksè nou.
Li enpòtan pou’w sonje ke reyalize objektif ou absoliman posib. Ou pral bezwen tonbe damou ak konsistans epi kòmanse fè yon pa chak jou pou atenn objektif ou yo.
Men 10 bagay ki anpeche’w atenn objektif ou yo :
1 . Pèfeksyonism
Anpil moun gen dezi pwofon nan tèt yo epi vle reyalize kèk gwo bagay nan lavi yo. Men, yo gen goumandiz epi depi avan yo resevwa yon bagay, yo pa menm montre apresyasyon pou li, epi yo vle plis pase sa yo merite.
Anpil moun gen yon esperans ki pa reyalistik. Pa egzanp, yo vle pou yo ofri yon travay wo klas ak yon salè wo pou fè gwo lajan menm si yo pa kalifye pou sa, e yo vle vin rich rapid vit.
Sa se yon move apwòch. Paske, anvan ou dwe rekonesan pou sa ou genyen deja. E menm si ou wè li pa anpil, gen moun ki posede mwens ke ou e ki rekonesan. Se sèlman lè sa ou pral reyalize ke ou gen pouvwa pou’w ogmante posesyon’w, e w’ap santi yon pouse pou fè tout sa ki posib pou’w reyalize sa. Se konsa ou ka elimine pèfeksyonism nan lavi ou epi reyalize sa ou vle.
2 . Ou pè echèk
Nou gen yon move pèsepsyon sou sa echèk vle di. Pifò moun pè echèk epi sa fè yo pa menm vle eseye paske yo wè gen posiblite pou yo pa reyisi. Akoz li ka fasil pou echwe nan anpil bagay, moun vin paralize ak perèz pou echèk, epi sa koz rèv yo janm reyalize.
An reyalite, echèk se yon kado presye. Li se yon etap inevitab sou wout siksè ou, e se yon etap ou pral pase plizyè fwa. Pa gen okenn gwo reyalizasyon nan mond lan ki pat gen echèk sou wout li.
Echèk se prèv ke w’ap eseye, ke w’ap fè yon bagay pou’w jwenn sa w’ap cheche, epi ou pa vle bay vag. Echèk ba ou leson ak eksperyans ou pral bezwen pou vin pi fò, vin gen plis volonte, epi pou w konsantre plis.
Si ou koute echèk, l’ap gide ou nan bon chemen an, paske echèk montre’w egzakteman kisa pou’w pa fè pwochèn fwa paske li pa’t mache dènye fwa a. Si w kontinye eseye, yon jou w’ap jwenn solisyon an.
Pa gen pi bon egzanp pase Thomas Edison lè’l t’ap envante anpoul elektrik. Daprè li, li te eseye 10000 (di mil) fwa avan li te resi fonksyone: Men kisa li di:
“Mwen pa’t janm echwe. Mwen te jis jwenn 10,000 fason ke li pa’t fonksyone.”
3 . Ou konsantre sou rezilta final la
Nou anvi atenn objektif ou yo, epi sa ka fè nenpòt moun enpasyan paske nou vle li touswit. Nou pa menm vle tann epi travay pou sa.
Li enpòtan pou w sonje ke bagay yo pa mache konsa. Sèl bagay ou bezwen se apresye pwosesis la epi konsantre mwens sou rezilta final la. Lè ou konsantre sou sa ou dwe fè chak jou, w’ap jwenn rezilta final ou te vle a.
4 . Ou pran twò gwo etap
Chemen siksè a genyen anpil ti etap, paske gwo etap yo fè nou enkyete, pè, jiskaske nou pa menm eseye. Kidonk, divize objektif ou yo an yon pakèt ti etap, jiskaske ou gen yon lis travay ki ase senp pou fè chak jou. Epi fè yo tèlman fasil ak rapid ke li pral enposib pou’w refize fè yo.
5 . Eskiz
Ou ka souvan tande tèt ou k’ap repete kèk nan bagay sa yo:
Mwen pa pare;
Moman sa a pa bon pou’m komanse;
Mwen pa bon/entelijan ase;
Mwen twò granmoun/jèn;
Mwen pa gen ase lajan/tan/eksperyans;
Pifò moun pa reyisi de tout fason, mwen pap reyisi non plis;
Li twò difisil;
L’ap pran twò lontan;
Moun ap ri’m.
Lè sa rive, pran yon ti tan epi reflechi sou rezon ki fè w’ap di sa. Reyalize ke lespri’w gen anpil may e li prefere rete nan zòn de konfò li. Lespri ou renmen kontinye fè menm aktivite li abitye yo, fonksyone an mod otomatik, epi refize eseye anyen de nouvo. Reyalize ke tout panze sa yo ridikil. Paske si ou chwazi lòt opsyon an – si ou kwè yo – ou p’ap janm fè anyen de nouvo ak lavi ou, epi ou p’ap janm wè bagay ou dezire yo tounen reyalite.
6 . Pwokrastinasyon
Pwokrastinasyon se yon lòt bagay ki anpeche nou poze aksyon anvè objektif nou yo. Men sa pou’w toujou sonje: kounye a menm se pi bon moman pou poze aksyon sou sa ou vle. Moman prezan an se kote ou kreye avni ou ak sèl lè ou ka pwodiktif ak travay sou sa ou dezire.
Sèl gerizon pou pwokrastinasyon se kòmanse fè yon bagay imedyatman, san ou pa reflechi epi bay tèt ou tan pou vini ak eskiz, san ou pa doute de kapasite w epi pè echèk.
Jis fè yon ti bagay jodi a ki pral ede w avanse epi vin pi pwoch ak rèv ou.
7 . Ou espere twòp
Sispann espere twop. Se yon abitid destriktif ki bay gwo desepsyon nan lavi ou. Ou espere pou bagay yo rive yon fason kèlkonk, ou espere pou moun ta aji nan fason ke ou vle, epi chak fwa sa pa mache, ou santi ou fache epi pèdi tout motivasyon pou’w poze aksyon.
Jete imajinasyon sa yo, elimine senaryo ou jwe nan tèt ou yo de ki jan bagay yo ta dwe ye, epi aksepte yo jan yo ye a. Epi pandan se tan, kontinye fè sa ou konnen ki dwat pou siksè’w.
8 . Distraksyon
Gen moun ki pral doute de ou epi fè ou pèdi espwa si ou koute yo. Ap gen tou anpil tantasyon sou wout siksè ou. Anpil nan tantasyon sa yo ka rive fè’w plezi, men yo gaspiye tan’w.
Ou ka souvan santi ke lavi a pa jis paske lòt moun gen anpil tan, epi yo ka manje oswa achte nenpòt sa yo vle, epi oumenm ou pa kapab. Men sa pa verite. Se jis ke ou chwazi travay sou objektif ou epi fè efò pou yon lavi miyò, pandan ke lòt yo pran chemen fasil la- lage ko yo nan aktivite ki sèlman pote ti jwa tanporè.
9 . Mank konsistans
Konsistans se lè ou kontinye travay sou yon bagay jiskaske ou rive akonpli’l, san’w pa kite distraksyon an mank motivasyon afekte’w. Konsistans se yon gwo bagay, paske ou pap wè okenn pwogrè nan sa w’ap fè si ou pa fè li chak jou.
Konsistans se yon karakteristik moun ki gen fè siksè , epi li vin yon abitid, tankou tout lòt bagay. Men, san li, ou pap rive lwen.
Li pi bon pou w fè yon bagay pandan 15-30 minit chak jou pase pou w fè yon bagay sèlman yon fwa pa semèn pandan plizyè èd tan.
10 . Pase tan’w nan foul ki pa sanble’w
Tip de moun ke ou asosye’w avèk yo gen yon gran enpak sou siksè’w. Reflechi sou ak ki moun ou pase tan’w chak jou. Eske se moun ki jis ap viv san yo pap regle anyen? Eske se tafyatè yo ye? Eske se moun ki gen valè familyal? Li enpòtan pou’w mache ak moun k’ap ka ede’w avanse epi ankouraje’w. Li enpòtan pou’w ede yo avanse tou.
An konklizyon, men sa ou dwe konnen sou reyalizasyon objektif ou:
“Ou pa jwenn sa ou vle, oswa sa ou panse ou merite. Olye de sa, ou jwenn egzakteman rezilta sa ou travay sou li, sa ou konsantre’w sou li, sa ou poze aksyon chak jou sou li.”
Hello zanmi’m! Si’w enterese ak jan de atik sa yo ak anpil lòt, ale anba paj la nèt pou’w ka swiv nou sou Facebook!
Tape bouton anba a pou’w ka pataje’l ak zanmi’w yo!
Mèsi anpil!!!
