Represyon ak diskou administrasyon aktyèl la sou imigrasyon fè imigran yo santi yo mwens akeyi nan peyi Etazini. Men, gen kèk vil nan Etazini ki dezobeyi manda federal yo epi kap akeyi imigran yo ak pwogram ak règleman ki bon pou yo.
Kowalisyon Imigrasyon New York ak platfòm transfè lajan entènasyonal Transferwise kreye yon mezi ki montre pi bon ak pi move vil Etazini pou imigran yo. Endèks la baze sou 9 kritè kle tankou pri lavi, pwogram idantifikasyon imigran ak salè minimòm.
Men 10 pi bon vil Ozetazini pou imigran yo, dapre endèks la. Li jiska la fen pou w ka wè premye a.
10. Milwaukee, Wisconsin
Milwaukee ofri imigran yo bon lekòl matènèl, pri lavi ki pa chè epi yon pwogram idantifikasyon minisipal ki ra, ki pèmèt imigran yo jwenn aksè a sèvis yo kèlkeswa stati imigratwa yo.
Menm jan ak lòt vil ki byen klase sou lis la, Milwaukee limite operasyon ICE yo pou arete imigran nan anpil ka.
9. Los Angeles, Kalifòni (California)
Los Angeles gen dezyèm pi gwo konsantrasyon imigran sou lis la, ak 38% popilasyon an ki imigran. Kalifòni se yon eta ki trè akeyan pou imigran, li gen 7 nan 20 premye vil ki pi bon pou imigran nan peyi Etazini.
Los Angeles gen lekòl matènèl inivèsèl ak yon salè minimòm $12/èdtan ki pi wo anpil pase salè minimòm mwayèn Etazini ki se $8.15/èdtan. Kalifòni te vote tou yon lwa “eta refij” an Oktòb 2017 ki limite koperasyon ant ofisyèl lokal yo ak ofisye imigrasyon federal yo.
8. Boston, Masachousèt (Massachusetts)
Boston gen yon long istwa nan akèy imigran, e vil la gen stati vil refij. Yon salè minimòm $11/èdtan ki fenk antre an vigè, lekòl matènèl inivèsèl ak opsyon transpò piblik abòdab.
7. Seattle, Washington
Popilasyon Seattle la gen prèske 20% popilasyon an ki imigran ladan l, epi vil la toujou anvi bay imigran yo yon koutmen. Seattle gen yon pwogram ki rele “Ready to Work” ki konbine kou Anglè kòm yon Dezyèm Lang (ESL) ak ansèyman sou òdinatè ak responsab pou ede imigran yo jwenn konpetans pou yo pare pou travay epi avanse nan direksyon pou yo vin endepandan ekonomikman.
Depatman Travay Etazini an idantifye pwogram inovatè sa a kòm yon egzanp pi bon pratik sou kijan pou ogmante finansman pou travay, pou ede entegre imigran yo nan mache travay la.
6. Baltimore, Maryland
Baltimore ap travay di pou l vin yon vil ki akeyi imigran yo. Ansyen Majistra Stephanie Rawlings-Blake te fikse yon objektif anbisye pou ogmante popilasyon vil la pa 10,000 nouvo fanmi pandan 10 zan, sitou pou atire imigran yo.
Baltimore te adopte yon politik ki entèdi lapolis ak lòt ofisyèl poze rezidan yo kesyon sou sitiyasyon imigratwa yo. Epi vil la te prezante yon pwojè lwa pou kat idantite ofisyèl gouvènman an nan lane 2016.
Kat idantite yo se yon pwoblèm enpòtan pou imigran yo paske yo afekte aksè a kont labank ak sèvis gouvènman yo.
5. Washington DC
Kapital nasyon nou an se yon destinasyon popilè pou imigran yo ak yon popilasyon imigran ki depase 14%, pami yo 40% se sitwayen natiralize.
4. San Jose, Kalifòni (California)
Biwo Afè Imigran San Jose a ap travay pou angaje epi akeyi imigran yo. Vil la pale avèk fyète de aspirasyon li pou l vin yon vil miltikiltirèl ki renome atravè lemond.
Pou rive atenn objektif sa a, San Jose pa sispann lanse pwogram ak kanpay inovatè ki fèt pou ede imigran yo pandan plizyè dènye ane yo. Yo te menm pwomèt pou mete 1.5 milyon dola nan asistans legal pou ede imigran k ap fè fas ak deportasyon. Vil la te kòmanse tou yon pwogram an 2017 pou edike imigran yo sou dwa yo epi diminye restriksyon pou pèmèt legliz yo bay refij pou rezidan san papye si gen operasyon deportasyon.
3. Vil Nouyòk (New York)
Nouyòk gen yon plas espesyal nan listwa mondyal pou wòl li jwe nan akeyi imigran yo avèk fyète Ozetazini. Malgre lavi chè a wo nan New York, li depase anpil lòt vil yo akòz pwogram ak règleman vil li yo ki akeyan pou imigran yo.
Nouyòk gen pi gwo pwogram idantifikasyon minisipal nan peyi a. Prèske tout gwoup etnik imigran yo byen reprezante nan anpil katye nan vil la. Nouyòk limite tou fason ajans lapolis li yo kolabore ak ICE.
2. Chikago, Ilinwa (Chicago, Illinois)
Chicago pataje anpil karakteristik ak New York, tankou yon pwogram idantifikasyon minisipal, lekòl matènèl inivèsèl ak yon salè minimòm ki wo. Epi Chicago gen yon to lavi chè ki pi ba pase NYC. Chicago menm lanse yon kanpay piblik inovatè pou akeyi imigran yo epi dirije yo nan enfòmasyon sou sitwayènte, èd legal ak swen sante mantal.
1. San Francisco, Kalifòni (California)
San Francisco te rive jwenn bon nòt sou tout nèf kritè klasman yo eksepte pri lavi chè a ki 62% pi wo pase mwayèn Etazini. Pri kay yo te monte anpil akòz endistri teknoloji a ak nouvo antrepriz yo k ap boujonnen.
San Francisco te satisfè tout lòt kritè imigran yo, tankou estati vil refij, kat idantite minisipal e menm yon Biwo Angajman Sivik ak Afè Imigran. Transpò piblik San Francisco a abòdab e pousantaj gradyasyon lekòl segondè nan vil la pi wo pase Chicago ak Nouyòk.
