1. Pa gen moun ki renmen antoure pa negativite tout tan
Eske ou pa remake moun souvan ekate yo de moun ki renmen plede plenyen tout tan?
Lè w bò kote moun ki toujou ap penyen de yon bagay, w’ap remake sa retire la jwa ou ti kras pa ti kras. Si tout konvèsaysyon‘w ak zanmi’w yo fè’w parèt tankou yon moun ki mizerab, ki moun ki pral anvi selebre epi pase yon bon moman lè’w la?
Lè ou antre nan yon sal, si moun yo gen tandans gaye oswa jwenn yon eskiz pou yo ale lwen ou, petèt li lè pou w tcheke atitid ou epi koute pawòl ki soti nan bouch ou. Ou ka detwi vayb pozitif lè w’ap plede plenyen de tout ti bagay.
2. Li fè’w parèt tankou yon moun ki engra
Pifò paran enstwi pitit yo ke yo pa ka espere ke Linivè pral ba yo okenn lòt bagay nan lavi yo si yo pa rekonesan pou benediksyon yo. Ki dènye fwa ou te gen rekonesans pou tout sa ou gen deja? Dapre etid psikolijik ki fèt, rekonesans ka afekte byennèt jeneral ou pozitivman.
Èske yon mank de apresyasyon ak rekonesans ka lakòz yon eta plenyen kwonik? Yon fwa ou kòmanse konte benediksyon ou yo, ou ka byento reyalize ke yo depase fado ou yo.
3. Plenyen fè ou bloke nan tan pase
Pandan w ap analize fason ou panse nan konvèsasyon w yo, èske konvèsasyon ou yo anjeneral gen rapò ak bagay mal ki te rive nan tan pase? Lè w’ap viv nan le pase, li bloke kapasite’w pou ou prezan nan moman sa a menm.
Si ou rete apiye sou eksperyans twomatizan ou te fè nan tan pase, l’ap kenbe ou nan yon sik ke w’ap mal pou soti ladann. A chak fwa ou plenyen, ou pèdi benediksyon ki devan je ou kounye a. Anplis de sa, plede plenyen ka fè ou vin devlope twoub depresyon.
4. Negativite bay nesans ak plis negativite
Si ou te etidye lwa atraksyon, w’ap reyalize ke atitid ou ka atire plis moun ki gen menm atitid la sou ou, kit se bon oswa movè. Panse a lavi ou tankou yon jaden, epi atitid ou ak konvèsasyon se grenn w’ap simen yo. Jaden lavi ou depann de grenn ou plante ak fason ou kiltive yo.
Negativite tankou move zèb ki anvayisan, e move zèb yo ka toufe bon grenn yo. Ou pa ka kontinye pwodwi panse negatif ak pawòl ou ak panse ou epi pou’w espere jwenn bagay ki pozitif an retou. Si ou vle bagay pozitif antre nan lavi ou, ou dwe atire yo ak yon mantalite pozitif.
5. Sik danjere plede lonje dwèt sou lòt difisil pou jere
Youn nan pi gwo pwoblèm moun ki renmen plenyen anpil se ke yo souvan refize aksepte erè avèk tò yo. Olye pou yo pran responsabilite epi aksepte blam pou yon bagay yo te fè, yo lage tò a sou lòt moun. W’ap souvan tande y’ap blame lòt moun pou enpèfeksyon yo oswa aksyon yo fè ki blese moun.
Yo rapid pou lonje dwèt sou yon fanmi, yon zanmi, oubyen yon kòlèg nenpòt lè yo fè yon erè. Yo avegle pa sa ki te rive yo nan le pase, epi yo refize gen kouraj pou mande eskiz pou move aksyon yo
6. Li fè ou pa ka fè fas pwoblèm lavi a voye sou ou
Youn nan bagay pou’w reyalize se ke gen anpil bagay nan lavi a ki andeyò kontwòl ou. Olye pou w’ap plede babye e plenyen sou sa ou pa ka chanje, itilize abilite ou pou chanje atitid ou de pwoblèm sa yo. Menm jan ou bezwen fe egzesis fizik si ou bezwen djanm fizikman epi miskilè, ou ka fè egzesis mantal tou k’ap pèmèt ou gen yon tèt ki djanm. Si ou lage kò’w nan yon ma labou ingratitid ak negativite, lespri ou pap gen okenn defans lè ou fè fas ak yon kriz.
7. Pa gen moun ki vle fè pati yon lavi mizerab k’ap degrenngole
Mimire ak plenyen tout tan afekte non selman moun ki mizerab la, men lòt moun tou. Souvan, w’ap remake ke vye atitid yo genyen an anvayi lavi pèsonèl ak pwofesyonèl yo. Sa konn lakoz moun pa vle fonksyone avèk yo.
8. Ou fè patnè w santi ou pa apresye li
Bezwen lanmou ak apresyasyon se yon pati nan nesesite imen menm jan ak manje, dlo, ak kote pou ou abite. Sepandan, gen kèk moun ki panse si yo bay patnè (mandanm, mari, mennaj) yo ak fanmi yo bezwen materyèl debaz yo, travay yo fini. Sepandan, yon moun ki toujou ap kritike patnè li pa fè anyen pou montre moun lan enpòtans li, epi blese moun lan emosyonèlman.
Ki jan ou santi ou lè patnè ou toujou chache jwenn yon erè nan tout sa ou fè? Li fè’w santi ou tris, poukont ou, ak endiy. Ou ka santi ke ou pa ka fè anyen ki ap fè yo plezi.
9. Moun ap sispann koute lè ou pale ak yo
Èske ou santi moun konn tande ou, men yo pa pote atansyon a sa w’ap di a? Se vre gen anpil moun ki manke kapasite pou koute aktivman. Sepandan, anpil moun ka jis evite pote atansyon ak opinyon ou yo ki chaje kritik ak yon bann plenyay.
Menm si ou se yon moun ki gen anpil konesans ak eksperyans solid, moun ka sispann koute’w akòz atitid negatif ou. Si ou twò egzijan nan fason ou bay enstriksyon oubyen ou bay twòp valè avèk detay ki pa nesesè lè w ap eseye yon bagay nouvo, pa panse w’ap jwenn admirasyon nan men okenn moun.
10. Ou ka vin twouve ou nan la solitid ak mekontantman
Lè ou rive nan yon enpas kote pa gen anyen ki ba’w la jwa, ou pwoteste ak bougonnen sou tout moun ak tout bagay ki egziste. Si pa gen anyen ki satisfè ou, ebyen Linivè p’ap ofri ou anyen ki pou fè ou kontan.
Pou kèk moun, reyalizasyon piman bouk sa a sifi pou netwaye lavi yo epi kòmanse rekonstwi relasyon yo ki domaje. Se se pa yon bagay ki fasil pou’w reyalize. Pafwa, gen moun ki bezwen opsyon tretman nan men yon psikològ pou simonte atitid plenyen tout tan sa a ak mank de satisfaksyon jeneral.
Panse final sou rezilta negatif plenyen tout tan
Ou se sèl moun nan mond lan ki responsab lajwa ou. Si w’ap nwaye nan ma labou bay lòt moun tò ak plede plenyen, relasyon pèsonèl ak pwofesyonèl ou yo ap soufri.
