Malgre gen yon ti diferans nan fason chak moun tonbe damou, jeneralman sa vle di ou gen santiman womantik avèk yon atraksyon pwisan nan yon moun. Donk, kisa ki montre ke’w kòmanse tonbe damou? Ann gade ansanm 15 siy ki montre sa
1 – Tan pase vit lè nou ansanm
Lè ou kòmanse tonbe damou, w’ap santi tankou tan ap vole lè nou ansanm, epi tan pase lantman lè nou separe. Ou renmen sòti ak moun sa a epi ou santi ou pa ta janm vle separe de li. Gen moun ki di tonbe damou fè ou pèdi sans reyalite. Li vin defòme pou ou epi ou pedi kontwòl tan.
2 – Lòt moun lan pafè (san defo) nan je ou
Gen anpil moun ki di lanmou avèg. Sa se pi bon fason pou dekri santiman’w de moun ou renmen an. Ou avèg pou defo l ak move abitid li yo. Li ka gen kèk konpòtman ki dwòl, men yo parèt nomal oubyen atiran nan je ou. Si yon moun esplike’w defo yo, ou rapidman vle defann yo. Lè ou damou yon moun, ou sèlman wè sa ki bon nan li.
3 – Ou panse ak yo tout tan
Youn nan siy ke’w pa ka nye lè ou tonbe damou se lè ou distrè paske ou pa janm ka sispann panse ak lòt moun lan. Li ka difisil pou’w konsantre nan travay oswa nan klas paske w toujou ap panse avèk li. Ou revize nan tèt ou chak pawòl yo te di’w ak chak moman nou te pase ansanm. Ou repete sa ou vle di yo lè nou rankontre ankò.
4 – Ou vle aprann tout bagay de yo
Youn nan lòt gwo siy lè ou tonbe damou se lè ou vle aprann tout sa ou kapab sou moun ou renmen an ki nan enterè relasyon an. Ou pral kirye sou sa li renmen manje, ki kote li renmen fè shopping, fim oubyen liv li pi renmen, elatriye. Chak detay yo pataje sou tèt yo ap fè’w plezi.
5 – Ou santi lavi a vin ekstraòdinè
Tonbe damou gen yon efè pwisan sou fason ou wè tout lavi ou. Tout bagay vin parèt bèl. Syantis yo di ke lè’w tonbe damou, ou degaje dopamin siplemantè nan kèk rejyon nan sèvo ou. Pwodui chimik sa yo lakòz ou santi plis kontantman nan vi ou. Menm antisipasyon pou pase tan avèk cheri ou ogmante nivo dopamin ou, ki fè ou santi w eksite pou w wè yo.
6 – Ou santi anpil afeksyon pou moun lan
Sètènman, lè ou damou ou santi anpil afeksyon anvè lòt moun nan. Kenbe men ak apiye youn sou lòt, sa fèt natirèlman. Menmsi si ou pat yon moun ki gen afeksyon oparavan, toudenkou ou vin gen afeksyon. Se sa ki ranfòse lanmou nou ki fè nou vle pase plis tan ansanm.
7 – Ou vle rete avèk yo tout tan
Yon lòt siy ke ou komanse tonbe damou se lè nou vle ansanm tout tan. Menm si ou pa renmen danse, w’ap dakò danse ak boubout la si li mande sa. Toudenkou, ou pral renmen fè yon seri de aktivite ki pat konn enterese’w jis pou pase tan ak cheri a. Zanmi ou yo pral grate tèt yo lè yo we koman ou komanse chanje.
8 – Ou ka pèdi apeti lè ou tonbe damou
Youn nan siy tonbe damou pou anpil moun se pèdi apeti. Lespri ou telman okipe ap panse a boubout la ke manje vin pa twò enterese’w ankò. Lanmou womantik, daprè lasyans, chanje konpòtman yon moun akòz liberasyon plizye òmòn. Gen kèk nan òmòn sa yo ki ka siprime apeti ou ak lakòz ou mal pou domi lè swa.
9 – Ou reve sou avni nou ansanm
Lè ou damou, li fè avni’w parèt ere ak eksitan. Ou ka reve sou koman lavi pral ye ansanm ak boubout ou, planifye maryaj ou, epi imajine konbyen timoun nou pral genyen. Li esansyèl pou fè mennaj ou konnen rèv ou pou relasyon an, pou nou ka sou menm longè d’ond.
10 – Ou vle rankontre fanmi yo ak zanmi yo
Lè ou damou, ou renmen tout bagay de lòt moun nan. Ou vle rankontre fanmi yo ak zanmi yo. Ou pral renmen rankontre yo epi renmen tande istwa sou lè mennaj ou t’ap grandi. Chak ti detay ap fè ou plezi epi fè ou renmen li plis toujou. Ou pral eseye fè tout efò pou ou prezante yon bon imaj de tèt ou a fanmi yo ak zanmi yo pou yo ka renmen ou epi apwouve relasyon an tou.
11 – Li se premye moun ou rele lè ou gen yon nouvèl
Cheri ou vin konfidan ou ak pi bon zanmi w. Se li menm ou rele chak fwa ou gen yon nouvèl, kit se bon oswa move. Ou santi ke lè ou pale avèk li, sa kalme w epi ede w deside kisa ou dwe fè. Si yon bagay fè ou fache, w’ap konnen y’ap la pou ou pandan w’ap travèse moman difisil la.
12 – Ou santi’w an sekirite ak moun lan lè ou tonbe damou
Yon siy ke ou tonbe damou se lè ou santi w an sekirite ak mennaj ou. Ou konnen yo gen pi bon enterè’w nan tèt ou. Ou santi ou ka esplike yo tout bagay san yo pap jije’w. Lè ou damou, w’ap pataje sekrè pwofon ak santiman’w ke ou pa’t di lòt moun. Natirèlman, sa se yon risk, sitou si relasyon an pa kontinye.
13 – Ou vle pwoteje yo
Lè ou tonbe damou, ou santi ou prè pou ou pwoteje boubout ou. Si yo gen yon moman difisil, ou se premye moun ki vle ankouraje epi ede li. Si yon moun ta manke cheri a dega, wa’p defann li e menm prè pou kraze amitye pou li. Ou pral pwoteje vi prive li. Ou p’ap di zanmi w bagay li te pataje avè w an sekrè.
14 – Ou vin emosyonel
Tonbe damou ka vle fè tèt ou pati. Ou pral santi’w emosyonèl. Bagay ki pat janm deranje w oparavan yo pral nwi ou toudenkou. Chanson damou pral fè w santi w womantik. Tonbe damou ka fè ou eksite pou relasyon an, epi an menm tan ou pè pou li pa kraze. Se poutèt sa lè ou fè eksperyans yon separasyon, ou santi li devaste’w emosyonèlman ak fizikman.
15 – Ou ka santi’w yon ti jan strese lè ou tonbe damou
Menmsi ou santi ou kontan lè ou avèk moun ou renmen an, tonbe damou ka lakòz strès. Kò ou degaje yon gwo kantite kòtisòl, yon òmòn strès, ki fè kè ou ap bat, epi pafwa ou enkyete. Men se pa yon bagay k’ap rete pou tout tan. Apre yon tan, pandan relasyon an ap pwogrese, w ap kalme epi w’ap santi w pi rilaks.
Yon dènye ti mo
Siy lè moun tonbe damou yo trè koni. Anpil fim, chante, ak poèm womantik dekri eksperyans sa a. Lè ou damou, w’ap santi anpil emosyon, genyen ki bon e genyen ki pa bon. W’ap vle pwoteje cheri’w, w’ap vle avèk yo tout tan, epi w’ap kontan rankontre fanmi ak zanmi yo. Antouka, se yon bèl eksperyans.
